Sibel Halimi është sociologe dhe poete. Halimi është doktorante në Departamentin e Sociologjisë të Universitetit të Prishtinës me temën “Trupi si konstrukt shoqëror: Drejt sociologjisë së trupit në Kosovë”. Deri tashti i ka të botuar katër vepra me poezi: “Kopshti i Mëkateve” (2002), “Qenia nuk banon këtu” (2013), “Me ekzistu është vetë kuptimi”, “Zoti më dashuron mua” (2022) si dhe përmbledhjen eseistike “Shoqëri në Alarm” (2017). Që nga viti 2004 merret aktivisht me studime, kërkime shkencore në fushën e studimeve gjinore dhe sociologjisë së trupit. Merret aktivisht me trajtimin e problemeve socio-filozofike, ndërkohë që shkrimet e saj janë botuar në periodikun shqip dhe të huaj. Njihet si veprimtare e të drejtave të njeriut, me theks të veçantë për të drejtat e grave dhe vajzave. Së fundmi, Halimi ishte kandidate për kryetare në Komunën e Ferizajt në zgjedhjet lokale 2021.

Teuta Sahatqija është anëtare e Kryesisë së Lidhjes Demokratike të Kosovës dhe anëtare e Departamentit për Punë të Jashtme. Ajo është inxhiniere, Master në elektronikë dhe Eksperte e Certifikuar për Transformim Digjital. Teuta ka kryer programin e avancuar për Gruanë, Gjininë dhe Seksualitetin në Dartmouth College të SHBAve. Përgjatë karrierës së saj Sahatqija ka demonstruar cilësi të lideres, fillimisht si inxhiniere dhe menaxhere, si drejtore dhe themeluese e kompanisë telekomunikuese dhe së fundi si lidere në politikë. Ajo ka qenë deputete në disa mandate, Konsulle e Përgjithshme e RKS në New York, Zëvendes Ministre e Punëve të Jashtme. Sahatqija është bashkëthemeluese e Grupit të Grave Deputete, të cilën e ka udhëhequr në mandatin e katërt legjislativ. Ajo është dalluar për ndërtimin e aleancave mes grave nga partitë dhe sektorët e ndryshëm. Sahatqija është bashkëthemeluese e Lobit Regjional të Grave, të KUSA, asociacionin e ish studentëve në SHBA. Së fundmi Teuta është drejtore e organizatës Women in Tech Kosova dhe Këshilltare e Kryetarit të Komunës së Prishtinës për Digjitalizim dhe Smart City. Teuta njihet si aktiviste për fuqizimin politik, ekonomik, shoqëror dhe së fundmi për fuqizim digjital të grave.

Tinka Kurti është deputete e Kuvendit të Kosovës nga rradhët e Lëvizjes Vetëvendosje dhe kryesuese e Grupit të Grave Deputete. Ajo është zëvendës kryetare e parë e Komisionit për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione. Që nga viti 2008 ajo ka punuar si gazetare në disa nga mediat e Kosovës, duke përfshirë televizionin kombëtar KTV, rrjetin e gazetarisë hulumtuese BIRN dhe organizatën ÇOHU. Si aktiviste e VV-së, Kurti ka qenë kryetare e Sekretariatit për Media dhe Komunikim. Ajo ka botuar disa artikuj autorialë mbi të drejtat e punës, barazinë sociale dhe skandalet politike. Ka përfunduar studimet për Gazetari në Fakultetin Filologjik të Universitetit të Prishtinës.

Vesa Broja është Kryesuese e Kuvnedit në Komunën e Mitrovicës nga rradhët e Partisë Demokratike të Kosovës. Broja ka qenë e angazhuar si Anëtare e këshillit drejtues në nivel qendror të PDK-së nga viti 2018, ka qenë kryetare e nëndegës në Mitrovicë nga viti 2018 si dhe sekretare për çështje gjinore në nivel të degës së PDK-së në Mitrovicë. Broja po ashtu ka qenë e angazhuar si Anëtare e Kryesisë së PDK-së në degën e Mitrovicës nga viti 2017 dhe tutje.Studimet i kreu në Fakultetin e Inxhinierisë Elektrike dhe Kompjuterike në Universitetin e Prishtinës, dega Telekomunikacion duke marrë titullin bachelor e inxhinierisë elektrike dhe kompjuterike.

Visar Ymeri është Drejtor Ekzekutiv në Insittutin për Politika Sociale Musine Kokalari në Prishtinë. Para kësaj, ai ishtë Zëvendës Kryetar në Partinë Social Demokrate për dy vite, dhe poashtu ishte Kryetar i Lëvizjes Vetëvendosje, lëvizje social demokrate në të cilën ka qenë i përfshirë nga viti 2005. Ai ka shërbyer si deputet për tre mandate, ku ka qenë anëtar në Komisionin e Përbashkët Parlamentar me Parlamentin Evropian në Implementimin e marrëvehjes se MSA-së. Ai poashtu ishtë anëtarë në Komisionin për Integrime Evropiane dhe Zhvillim Ekonomik, dhe Komisionin të Tregtisë dhe Industrisë. Ymeri gjithashtu ka punuar si Zyrtar për Marrëdhënie me Publikun në Trustin e Kursimeve Pensionale të Kosovës, dhe si zëvendësredaktor në televizionin kombëtar “Kohavision”. Ymeri ka studiuar Sociologji në Universitetin e Prishtinës dhe Studime për Media, Politikë, Letërsi dhe Filozofi në City dhe Islington College në Londër.

Vjosa Osmani-Sadriu ka lindur më 17 maj 1982 në Mitrovicë të Republikës së Kosovës. Ajo ka diplomuar në Fakultetin Juridik në Universitetin e Prishtinës dhe ka diplomë në nivelin master dhe Ph.D. në të Drejtën Ndërkombëtare nga Universiteti i Pittsburgut në Pensilvani, SHBA. Nga viti 2006 deri në vitin 2010, Vjosa Osmani ka shërbyer si Shefe e Kabinetit të Presidentit të Republikës së Kosovës, z. Fatmir Sejdiu, si dhe si Këshilltare e Lartë për Çështje Juridike dhe Marrëdhënie Ndërkombëtare. Gjatë kësaj kohe, Osmani ka përfaqësuar Presidentin në Komisionin për hartimin e Kushtetutës së Republikës së Kosovës dhe ka qenë gjithashtu anëtare e ekipit ligjor të Gjykatës Ndërkombëtare të Drejtësisë të Republikës së Kosovës, duke mbrojtur me sukses ligjshmërinë ndërkombëtare të Deklaratës së Pavarësisë së Kosovës. Presidentja Osmani më vonë shërbeu si deputete e Republikës së Kosovës duke u zgjedhur në pesë mandate radhazi. Si deputete ajo kryesoi Komisionin Parlamentar të Punëve të Jashtme, Komisionin për Integrime Evropiane dhe ishte zëvendëskryetare e Komisionit për Reformën Kushtetuese. Ajo shërbeu si kryetarja e parë grua e parlamentit nga data 3 shkurt 2020, dhe si ushtruese e detyrës së Presidentes nga data 5 nëntori 2020 – duke mbajtur të dyja funksionet deri më 22 mars 2021. Gjatë mandatit të saj të fundit në parlament ajo doli si kandidate për Presidente duke marrë numrin më të lartë të votave të çdo kandidati në historinë e Kuvendit të Kosovës. Me votën e Kuvendit të Kosovës, Vjosa Osmani u zgjodh dhe u betua Presidente e Republikës më 4 prill 2021. Dr. Osmani ka ligjëruar në Universitetin e Prishtinës, në Universitetin Amerikan të Kosovës (RIT) dhe në Universitetin e Pitsburgut. Në vitin 2017, ajo mori Çmimin Ndërkombëtar të Arritjeve të të Diplomuarëve të Rinj të Universitetit të Pittsburgh Sheth dhe ka shërbyer si anëtare e Bordit të Rrjetit Parlamentar në Bankën Botërore dhe FMN.

Vlora Çitaku është nënkryetare në Partinë Demokratike të Kosovës. Ajo ka shërbyer si ambasadore e Kosovës në Shtetet e Bashkuara të Amerikës. Më parë ka shërbyer si Konsull i Përgjithshëm i Kosovës në Nju Jork. Para se t'i bashkohej trupit diplomatik të Kosovës, Çitaku shërbeu si Ministre për Integrime Evropiane të Kosovës. Ajo u shqua si një nga ministret më të suksesshëm të qeverisë së Kosovës 2011-2014. Ajo hoqi dorë nga pozita e deputetes me marrjen e postit qeveritar, të cilin e fitoi si një nga tre kandidatët më të votuar. Vlora Çitaku ishte vetëm adoleshente kur u bë përkthyese për mediat kryesore perëndimore të lajmeve në fillimin e luftës në Kosovë. Më vonë ajo u bë refugjate gjatë luftës së Kosovës dhe është marrë me politikë që nga viti 1999. Fillimisht u bë zëdhënëse e UÇK-së dhe iu bashkua PDK-së pas formimit të partisë në Kosovën e pasluftës. Ajo ka qenë deputete në dy mandate. Ajo ka theksuar se i ka kapërcyer stereotipet në politikë se duhet të jesh i moshuar dhe burrë. Ajo ka qenë Ushtruese e Detyrës si Ministre e Punëve të Jashtme nga 18 tetori 2010 deri më 22 shkurt 2011.

Xhemajl Rexha ka punuar në mediat Kosovare nga viti 2005, duke filluar punën e tij si gazetar ne kanalin televiziv nacional, Kohavision (KTV) dhe më pas si kryeredaktor. Rexha ka mbuluar ngjarjet kryesore politike dhe sociale në Kosovë dhe rajon, duke filluar nga bisedimet në Vjenë lidhur me pavarësinë e Kosovës deri tek ciklet e plota të zgjedhjeve për gati dy dekada. Ai ka themeluar dhe ka udhëhequr emisionin “Interaktiv”, si emisioni më i shikuar në KTV nga viti 2009 deri në momentin kur kaloi në kompaninë e re televizive Kanal10, ku është Drejtori i Deskut Informativ udhëheq emisionin “Prime Time”. Rexha ka qenë i përfshirë në programe të ndryshme të Qeverisë Amerikane dhe Ambasadës Britanike në Kosovë. Aktualisht ai mban postin e Kryetarit të Bordit të Asociacionit të Gazetarëve të Kosovës.