Shpend Ahmeti është kryetar i kryeqytetit të Kosovës, Prishtinës. Ka përfunduar studimet master në Politika Publike në Universitetin e Harvardit, SH.B.A, në vitin 2004, duke specializuar në Zhvillimin Politik dhe Ekonomik. Studimet universitare i ka përfunduar në Ekonomi dhe Administrim Biznesi në Universitetin Amerikan në Bullgari, gjatë viteve 1996 – 2000, duke specializuar në Ekonomi të Aplikuar dhe Administrim Biznesi. Gjatë kohës së studimeve 1999-2002, Shpendi ishte senator dhe më pas Kryetar i Qeverisë Studentore në Universitetin Amerikan të Bullgarisë, si dhe udhëheqës i komuniteteve të ndryshme (nga më shumë se dhjetë vende) përgjatë një periudhe të reformave në universitet. Prej vitit 2005 Shpendi është ligjërues i Politikave Publike dhe Politikave Ekonomike Ndërkombëtare në Universitetin Amerikan këtu në Kosovë (AUK). Përveç gjuhës amtare shqipe, Shpendi flet edhe gjuhën angleze, serbo-kroate, maqedone, bullgare, por poashtu ka njohuri edhe të gjuhës gjermane. Është fitues i disa çmimeve e shpërblimeve sic janë World Bank Spot Award European Debating Championships. Shpendi jeton në Prishtinë me bashkëshorten, Ardianën dhe dy fëmijët.

Shqipe Gjocaj është specialiste e çeshtjeve gjinore, aktiviste feministe dhe gazetare e pavarur. Ajo ka përvojë tetë vjeçare në sektorin e shoqërisë civile dhe media. Ka punuar për disa projekte në OJQ-të lokale si studiuese dhe menaxhere e projekteve, përkatësisht për anti-korrupsionin, proceset zgjedhore dhe të drejtat e njeriut. Çështjet gjinore janë aspekti kryesor i punës së saj; perspektiva gjinore në zgjedhjet dhe proceset politike, përfshirja gjinore në politika dhe vendet e punës, të drejtat riprodhuese të grave, përfaqësimi gjinor në media, LGBTQ + dhe çështje të tjera që lidhen me politikat gjinore dhe seksualitetin. Ajo është një kontribuese e rregullt e Prishtina Insight ku shkruan për politikën dhe shoqërinë nga këndvështrimi gjinor dhe i të drejtave të njeriut. Artikujt e saj janë botuar gjithashtu në Kosovo2.0, sbunker dhe Reuters. Ajo përfundoi studimet master në Studime Kulturore nga College University të Hedmark në Norvegji dhe studimet bachelor në Gjuhë dhe Letërsi Angleze në Universitetin e Prishtinës. Gjuha e saj amtare është gjuha shqipe dhe flet rrjedhshëm anglisht, po ashtu në të shkruar.Ajo ishte anëtare në Ballkan Fellowship for Journalistic Excellence (2017); bashkëpunëtore e programit të Bursës së Gazetarisë për të Drejtat e Njeriut K2.0 (2019); pjesëmarrëse në IVLP: Gratë Lidere - Promovimi i Paqes dhe Sigurisë nga Departamenti i Shtetit i Sh.B.A.

Sonja Lokar është një eksperte e pavarur sllovene për cështjet e barazisë gjinore, e cila ka shërbyer si Kryetare e Paktit të Stabilitetit të Task Forcës Gjinore (1999-2009) dhe presidente e Lobit Evropian të Grave në 2012. Ajo është konsulente dhe ndërmjetësuese e Fondacionit LP Westminster në Misionet e OSBE-së në Serbi dhe Kosovë. Së fundmi, ajo ka qenë konsulente e NDI-së për aktivistet tuniziane dhe marokene nga parti të ndryshme politike, si dhe anëtare e NDI-së në misionin ndërkombëtar të vëzhgimit të zgjedhjeve të para të lira në Tunizi. Ajo poashtu ishte pjesë e procesit të krijimit të "Akademia e Grave për Afrikën”, në Maputo dhe Mozambik. Ekspertiza e saj përfshin krijimin dhe zbatimin e projekteve kombëtare dhe ndërkombëtare mbi barazinë gjinore (në Slloveni, dhe në 32 vende të ndryshme te botes, kryesisht vende në tranzicion) për gratë anëtare të partive të majta politike dhe gratë nga të gjitha sferat e jetës dhe nga të gjitha prapavijat politike. Ajo mori pjesë në takimin e Grupit të Ekspertëve të Grave të Kombeve të Bashkuara në Shtator të vitit 2020, duke përgatitur rekomandime për Sesionin 65 të Komisionit për Statusin e Grave të Kombeve të Bashkuara mbi fuqizimin politik të grave, të planifikuara për vitin 2021. Ajo është e diplomuar në Gjuhë Franceze dhe në Sociologji nga Universiteti i Lubjanës.

Teuta Haxhiu është deputete në Kuvendin e Republikës së Kosovës nga partia politike Aleanca për Ardhmërinë e Kosovës (AAK). Znj. Haxhiu ishte mësuese e matematikës për 27 vite, nënkryetare e degës së Gjakovës në vitin 2008 dhe Kryesuese e KK- Gjakovë gjatë vitit 2009. Aktualisht anëtare e kryesisë, nënkryetare e degës, anëtare e këshillit drejtues në AAK, si dhe ushtruese e detyrës së kryetares së Degës së AAK-së në Gjakovë. Ajo është anëtare në Komisionin për Arsim, Shkencë, Teknologji, Inovacion, Kulturë, Rini dhe Sport, Komisionin për të Drejtat e Njeriut, Barazi Gjinore, për Persona të Pagjetur dhe Peticione, Komisionin Hetimor Parlamentar mbi procesin e licencimit, operimit, mbikëqyrjes dhe aplikimit për lejet e hidrocentraleve në Republikën e Kosovës.

Tinka Kurti është deputete e Kuvendit të Kosovës nga rradhët e Lëvizjes Vetëvendosje dhe kryesuese e Grupit të Grave Deputete. Ajo është zëvendës kryetare e parë e Komisionit për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione. Që nga viti 2008 ajo ka punuar si gazetare në disa nga mediat e Kosovës, duke përfshirë televizionin kombëtar KTV, rrjetin e gazetarisë hulumtuese BIRN dhe organizatën ÇOHU. Si aktiviste e VV-së, Kurti ka qenë kryetare e Sekretariatit për Media dhe Komunikim. Ajo ka botuar disa artikuj autorialë mbi të drejtat e punës, barazinë sociale dhe skandalet politike. Ka përfunduar studimet për Gazetari në Fakultetin Filologjik të Universitetit të Prishtinës.

Uran Ismaili është deputet i Kuvendit të Republikës së Kosovës nga rradhët e Partisë Demokratike të Kosovës PDK. Ai është anëtar në Komisionin për Integrim Evropian dhe në Komisionin për Shëndetësi, Punë dhe Mirëqenie Sociale. Z. Ismailit poashtu është sekretar i përgjithshëm në partinë e PDK-së dhe kryetar i degës së PDK-së në Prishtinë. Më parë ka shërbyer si Ministër i Shëndetësisë i Republikës së Kosovës. Nga viti 2010 deri në vitin 2017, z.Ismaili ishte i angazhuar në sektorin publik si këshillues për Ministrinë e Transportit, Ministrinë e Bujqësisë dhe së fundmi si këshilltar / shef i stafit të Kryetarit të Kuvendit. Ai ka përvojë në zbatimin e projekteve të rëndësishme të infrastrukturës dhe zhvillimin e programeve kombëtare shumëvjeçare për grante në bujqësi. Urain Ismaili drejtoi Ministrinë e Bujqësisë në takime me donatorë nga BE, SH.B.A. dhe Bankën Botërore, duke zhvilluar programe që përfituan shumë sektorë në të gjithë zinxhirin bujqësor. Ai ka përfunduar studimet bachelor në Psikologji nga Universiteti Graceland në Iowa, dhe ka vazhduar studimet master në Administratë Publike në Harvard Kennedy School.

Valentina Bunjaku Rexhepi është deputete e Kuvendit të Kosovës nga radhët e Lidhjes Demokratike të Kosovës, dhe anëtare e bordit të Grupit të Grave Deputete. Ajo është gjithashtu anëtare e Komisionit për Ekonomi, Industri, Sipërmarrje dhe Tregti.Bunjaku Rexhepi ka përfaqësuar LDK-në në dy legjislaturat e kaluara. Ajo ka përfunduar studimet bachelor në matematikë në Universiteti i Prishtinës. Aktualisht punon si profesore e matematikës në Universitetin e Prishtinës.

Veton Berisha është deputet i Kuvendit të Republikës së Kosovës nga Partia Liberale Egjiptiane (PLE). Z. Berisha është anëtar i grupit parlamentar Nisma – Akr – 6+ dhe anëtar i Komisionit për Integrim Evropian, Komisionit për Buxhet dhe Transfere, Komisionit për të Drejtat dhe Interesat e Komuniteteve dhe Kthim, Komisioni për të Drejtat e Njeriut, Barazi Gjinore, per Persona të Pagjetur dhe Peticione, Komisionit Hetimor Parlamentar në lidhje me menaxhimin e pandemisë së virusit "COVID-19" nga ana e Qeverisë së Republikës së Kosovës. Z. Berisha përfundoi studimet pasuniversitare në nivelin master në Fakultetin Juridik në drejtimin Civilo-Juridik.

Veton Mujaj është drejtor ekzekutiv i organizatës joqeveritare Syri i Vizionit dhe e ka udhëhequr këtë organizatë që nga themelimi i saj në vitin 1999, fillimisht si themelues i revistës “Vizioni”e më pas edhe i organizatës “Syri i Vizionit”që u regjistrua në vitin 2001. Mujaj është ndër udhëheqësit në organizatat e shoqërisë civile që për një periudhë të gjatë ka qenë i përkushtuar në këtë sektor dhe ka një përvojë mbi 20 vjeçare në menaxhimin e organizatës. Në aspektin profesional ai është njohës i shkëlqyer i problematikës, legjislacionit dhe koncepteve të shoqërisë civile duke qenë ekspert dhe trajner i disa fushave që kryesisht kanë të bëjnë me shoqërinë civile. Ai ka përvojë në shkrimin e projekteve, si dhe në mbledhjen e fondeve për organizatën. Duke qenë edhe një aktivist publik, i angazhuar në shumë aktivitete në Kosovë dhe më gjerë, Mujaj është pjesëmarrës dhe bashkë organizator në shumë ngjarje që kanë pasur ndikim ne jetën publike të Kosovës. Mujaj është një zë i spikatur dhe nga autoritetet përfaqësuese të shoqërisë civile në Kosovë. Me angazhimin e tij personal Veton Mujaj në vazhdimësi ishte anëtar ose kryesues i bordit në disa rrjete të organizatave në nivel lokal dhe në rajonin e Evropës jug-lindore.

Vjosa Osmani është Presidente e Republikës së Kosovës në detyrë. Zonja Osmani është gruaja e parë e zgjedhur për të shërbyer si Kryetare e Kuvendit të Kosovës. Znj. Vjosa Osmani përfaqësoi LDK-në në tre legjislaturat e kaluara. Në legjislaturën e kaluar, zonja Osmani shërbeu si Kryetare e Komisionit për Punë të Jashtme, Diasporë dhe Investime Strategjike. Më parë, ajo ka shërbyer si Kryetare e Komisionit për Integrim Evropian dhe Nënkryetare e Komisionit për Reformën Kushtetuese në Kosovë. Znj. Osmani ishte gruaja më e votuar në zgjedhjet e përgjithshme të vitit 2017 dhe 2019 në Kosovë. Vjosa Osmani përfundoi studimet bachelor në Fakultetin e Drejtësisë, Universiteti i Prishtinës dhe ka përfunduar master dhe Ph.D. në Universitetin e Pittsburgh. Ajo ishte gjithashtu ligjeruese në Universitetin e Prishtinës, Universitetin e Pitsburgut dhe Universitetin Amerikan në Kosovë (AUK).

Vlora Limani Hajnuni është Kryetare e Grupit të Grave Deputete në Kuvendin e Kosovës. Ajo ishte anëtare e Asamblesë Komunale të Lipjanit nga Lidhja Demokratike e Kosovës për tre mandate radhazi (2009, 2013, 2017). Në vitin 2013, ajo u zgjodh Kryetare e Asamblesë Komunale, ndërsa në zgjedhjet lokale të vitit 2017, ajo ishte kandidatja më e votuar në komunën e Lipjanit dhe u bë pjesë e grave në asamble të zgjedhura pa kuotë. Gjatë të njëjtave zgjedhje lokale, znj. Vlora Limani Hajnuni ishte e angazhuar si koordinatore për hartimin e Platformës Zgjedhore të LDK-së në Lipjan dhe koordinatore e Zyrës për Informim. Në vitin 2017 ajo u emërua Drejtore në Drejtorinë e Shëndetit dhe Mirëqenies Sociale. Znj. Limani-Hajnuni është master i shkencave në Kimi.Gjithashtu, ishte ligjeruese në kolegjin ‘Pjetër Budi’.

Xhafer Tahiri është kryetar i Komunës së Vushtrrisë. Tahiri është ligjërues në Fakultetin Juridik, Universiteti i Prishtinës “Hasan Prishtina”. Më parë ka qenë ligjërues edhe në Fakultetin Juridik, Universiteti “Haxhi Zeka”, Pejë. Ka ushtruar edhe profesionin e Avokatit në Prishtinë. Në vitin 2014, z. Tahiri ka qenë Profesor Vizitues në SHBA, në Ohio Northern University. Gjatë kësaj periudhe ka mbajtur ligjërata për programin LLM të këtij Universiteti. Ka marrë pjesë në konferenca shkencore në Evropë dhe SHBA ku ka publikuar edhe punime shkencore në revista prestigjioze. Në vitin 2004, ka diplomuar në Universitetin e Prishtinës, Fakulteti Juridik. Në vitin 2005 ka kryer studimet Master në Shkenca Politke, në “Institucionet dhe Politikat e Bashkimit Evropian” në Fakultetin e Shkencave Politike, Universiteti i Bolonjës në Itali. Në vitin 2007, ka qëndruar për trajnime në Akademinë Diplomatike të Holandës, në Netherlands Institute of International Relations Clingendael. Në vitin 2008, ka kryer akademinë diplomatike shqiptare. Aktualisht z. Tahiri i vazhdon studimet e doktoratës në drejtësi në Fakultetin Juridik, Universiteti i Grazz në Austri. Tahiri është njohës i këtyre gjuhëve të huaja: Anglisht, Italisht, Serbo-Kroatisht, si dhe Arabisht dhe Turqisht. Tahiri ka qenë Kryetar i Forumit të Rinisë së LDK-së në Vushtrri dhe nga kjo pozitë është zgjedhur edhe Kryetar i FRLDK-së në nivel nacional në vitet 2009-2012. Si përfaqësues i rinisë së LDK-së është zgjedhur deputet i Kuvendit të Republikës së Kosovës.

Xhenet Syka Kelmendi është Drejtore e Drejtoratit të Rinisë Kulturës dhe Sportit. Është autore dhe redaktore e shumë artikujve dhe kolumneve profesionale për çështjen e përhapjes së dhunës në baza gjinore dhe ka botuar artikuj në revista vendore dhe ndërkombëtare me impakt faktor, përfshirë temat me hulumtime të avansuara pë pozitën e gruas shqipëtare ngaspektri vendor dhe global. Rrugëtimin politik e ka filluar në vitin 2007 si asambleiste në K.K. Pejë, për të vazhduar këtë detyrë edhe tre mandate të tjera duke qenë se ishte njëra ndër femrat më të votuar në nivel vendi. Shquhet për ideologjinë feministe dhe është aktiviste për të drejtat e njeriut me theks të veçantë për gratë dhe fëmijët. Prej vitit 2010 është kryetare e bordit profesional tek Qendra për Mirëqenien e Gruas – Shtëpia e Sigurt në Pejë, detyrë kjo që drejtpërdrejt e plason si anëtare e rrjetit të grave aktiviste në Evropë – WAVE-Europe. Karrierën profesionale e ka filluar në Shtator të vitit 1999 si gazetare në Radio “Dukagjini”, për të vazhduar si redaktore përgjegjëse dhe drejtoreshë administrative në Televizionin “Dukagjini”, ku ka punuar deri në Janar të vitit 2017. Gjatë kësaj periudhe shquhet në drejtimin e emisioneve autoriale nga lëmi politiko-social, ekonomik, shëndetësor dhe ai kulturor. Ajo ka mbaruar me studimet Bachelor në Administrim Biznesi. Pas mbarimit të masterit profesional EMBA në IEDC-Bled School of Management, është angazhuar edhe si lektore dhe drejtuese për Marketing dhe Marrëdhënie me Publikun në Kolegjin Evropian”Dukagjini” në Pejë, ku ka qenë edhe anëtare e bordit menaxhues.